“Yeddi rayonun qaytarılması əslində alver predmetidir. Rusiya rəsmi dairələri deyə bilmədiyini politoloqlarına hər hansı bir yazı ilə dedizdirirlər”.

Bunu Hafta.az-a açıqlamasında politoloq Ərəstun Oruclu son günlər yenidən gündəmə gələn işğal olunmuş yeddi rayonun Azərbaycana qaytarılması ilə bağlı xəbərlərə münasibət bildirərkən deyib. Politoloqun sözlərinə görə, bu fikir ilk dəfə bir neçə ay əvvəl ABŞ tərəfindən gündəmə gəlib: “Təxminən 2-3 ay əvvəl ATƏT-in ABŞ-ı təmsil edən həmsədri Dağlıq Qarabağ ətrafındakı işğal olunmuş yeddi rayonun qaytarılmasını gündəmə gətirib. Sonradan Vaşinqton bunu Dövlət Departamenti səviyyəsində təsdiq etdi”.

Ərəstun Oruclu bildirib ki, adıçəkilən məsələ istənilən halda həm Qərbin, həm də Rusiyanın Azərbaycana təzyiq vasitəsi kimi başa düşülür: “Ən yüngül formada desək, bu alver predmetidir. Yeddi rayonun qaytarılması, mübahisəli Dağlıq Qarabağ ərazilərinə sülhməramlı yerləşdirmək deməkdir. Həmçinin, Rusiyanın niyyəti bu məsələni yenidən gündəmə gətirməklə, Azərbaycanı Gömrük İttifaqına gətirmək istəyir. Bundan başqa, Kremlin yeddi rayonu qaytarmaq ismarışında Moskvanın Xəzərin Azərbaycan sektorunda möhkəmlənmək niyyəti var. Düşünürəm ki, istənilən halda Azərbaycan bunların heç birini qəbul etməməlidir”.

Politoloq Azərbaycanın Rusiyanın gündəmə gətirdiyi “yeddi rayon” şərtinə uymamasının səbəblərini də açıqlayıb: “Rusiya 7 rayonu qaytarmağın əvəzində Dağlıq Qarabağla təmas xəttimizə “sülhməramlı” yerləşdirmək istəyir. Bu da Rusiya qoşunlarının Azərbaycan ərazisinə yeridilməsi deməkdir.  Onlar bununla da vəziyyəti daha yaxından “idarə etmək” istəyir. Bir sözlə, rus ordusu Qarabağa gələrsə, onları çıxarmaq da çətin olacaq. Bundan başqa, Azərbaycan diplomatik səviyyədə də münaqişəni uduzmuş olacaq. Çünki bununla biz Qarabağın hüquqi olaraq Azərbaycan torpağı olduğunu şübhə altında qoymuş oluruq. Xəzərdə möhkəmlənmək əvəzinə yeddi rayonun qaytarılması məsələsi də bizim xeyrimizə deyil. O zaman da ölkəmiz iqtisadi cəhətdən öz maraqlarına ciddi zərbə vurmuş olacaq”.

Xatırladaq ki, son bir həftə ərzində Rusiya mediasında ard-arda rus politoloqları tezliklə Azərbaycanın işğal altında olan yeddi rayonunun qaytarılması məsələsini gündəmə gətirib. Onlar bu məsələnin qarşılıqlı razılaşma əsasında mümkün olduğunu bildirib. Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev bununla bağlı Hafta.az-a açıqlamasında məsələyə Azərbaycanın mövqeyinin birmənalı olduğunu bildirib: “Azərbaycanın ərazi bütövlüyü heç bir halda danışıqlar mövzusu ola bilməz”.