Virtualaz.org saytı nüfuzlu “Forbes” jurnalının Rusiyada president Vladimir Putinə qarşı “tədrici qiyam yetişdiyinə” dair sensasion məqaləsinin xülasəsini dərc etmişdi.

Bu məqalə geniş rezonans doğurub. Fransanın “Atlantico” jurnalı Paris siyasi araşdırmalar İnstitutunun professorları Siril Bre və Florian Parmantye ilə həmin məqalədə əksini tapan məlumatları və Putinin Kremldəki “Politbüro 2.0” adlı qrup tərəfindən devriləcəyinə dair iddiaları müzakirə edib.

Florian Parmantyenin fikrincə, ilk baxışdan “Forbes”də yer alan informasiya paradoksal görünə bilər. Çünki Krımın fəth edilməsindən sonra Vladimir Putinin reytinqi heç vaxt olmayan qədər yüksəkdir.

Bununla belə Putinin şəxsi hakimiyyəti Rusiya iqtisadiyyatındakı çətinlikləri nəzərə almaqla son vaxtlar bir qədər laxlayıb. Ekspertə görə Rusiyada siyasi çətinlikləri çox gözləmək lazım gəlməyəcək. Yəni Putinin populyarlığının əsasları çat verə bilər.

“Məqalənin mənası odur ki, Putinin qarşısında çətin seçim dayanıb, elitanın çoxu isə onun hakimiyyətinin qalmasında maraqlı deyi. Putini tez-tez yeganə “xozeyin” kimi təqdim edirlər, ancaq Rusiyada deyildiyi kimi, “Kremlin çox qülləsi var”.

Prezident Putin müxtəlif qruplar arasında tretey hakimi rolunu oynayır. “Ləng qiyam” isə onun yaxın çevrəsinə zərbələri nəzərdə tutur, çünki Putin özü seçilmiş prezidentdir və hələ çox populyardır”- deyə Florian Parmantye bildirib.

Siril Brenin fikrincə isə Rusiyada vəziyyətin müəkkəbləşməsi mümkündür, ancaq məhdud miqyaslarda. Hazırda Rusiyanın beynəlxalq aləmdən təcrid olunduğu haqda deyilənlər şişirtmədir. Qərblə münasibətlər mürəkkəbləşsə də Rusiya digər istiqamətlərdə münasibətlərini inkişaf etdirir. Lakin neftin ucuzlaşması və sanksiyalar nəticəsində Rusiya biznesi maliyyə əldə edə bilməsə situasiya onda kəskinləşə bilər.

“Bu, Rusiya prezidenti üçün ən kritik məqamdır. Bununla belə, bu o demək deyil ki, Putinin populyarlığı aşağı düşür, elita üzərində nəzarəti zəifləyir. Əhalidə milli prestij naminə özünü kollektiv qurban vermək hissi var, elita isə çoxdan alternativ strategiyalar hazırlayıb. Başqa sözlə, yaxın gələcəkdə diplomatik və iqtisadi çətinliklər Rusiya prezidentinin şəxsi liderliyini şübhə altına almayacaq”- ekspert deyib.

Bəs “Forbes”in məqaləsində bəhs edilən və Putini hakimiyyətdən uzaqlaşdırmaq istəyən “Polibüro 2.0” nədir?

Florian Parmantye deyir ki, bu ifadə Putinin yaxın tərəfdaşlarından ibarət klanı nəzərdə tutur.

“Rusiya hakimiyyəti təkcə “vertikal”dan ibarət deyil, ona klanlardan və qruplardan ibarət konqlomerat kimi baxmaq lazımdır. Bu klanlar və qruplar müəyyən resurslar uğrunda bir-biri ilə rəqabət aparırlar”-Parmantye deyib.

Siril Bre isə deyir ki, Putinin yaxın ətrafına daxil olanların barəsində korrupsiya faktlarının ortaya çıxmasına baxmayaraq prezidentin reytinqi zəifləmir. Qərbdən fərqli olaraq Rusiyada korrupsiya faktları qalmaqala səbəb olmur, çünki bu ölkədə korrupsiya hakimiyyətin ayrılmaz atributu kimi qəbul edilir.

“Ancaq əhali doğrudan da prezidentin şəxsiyyətinə bağlı olsa da bu hisslər əbədi deyil. Ortamüddətli perspektivdə sosial xərclərin ixtisarı və ya Rusiyanın alçaldılması bu “ictimai müqaviləni” poza bilər”- deyə ekspert bildirir.

Virtualaz.org