Şanlıurfanın Suruc rayonunda sosialist kürdlərin keçirdiyi aksiyada baş verən partlayış Türkiyənin ictimai-siyasi həyatına yeni rənglər qatmağa başlayıb. Baş verən partlayış İŞİD-in planı olması sübut olunsa da, PKK bunu Türkiyə hökumətinin adına yazaraq, terror aksiyalarına start verib. İstanbula qədər uzanan PKK hökumət qarşısında separatçı və Türkiyə dövlətinin suverenliyini təhdid edən iddialar qaldırır. Beləliklə, Suruc hadisəsi terror təşkilatının fəallaşması üçün stimulyator rolunu oynadı və bu da, birmənalı deyil.

Məsələ ilə əlaqədar “Olaylar”ın sualını cavablandıran politoloq Qabil Hüseynli bildirdi ki, PKK-nın fəallaşmasına səbəb təşkilatın qollarının, TBMM-ə seçilmiş Xalqların Demokratiya Partiyasının (HDP-nin) və separatçı kürdlərin Türkiyə daxilində pozuculuq işləri aparmasıdır. AKP hökumətinin Suriyaya könüllülərin göndərilməsini qadağan edən qərarını xatırladan Q. Hüseynlinin sözlərinə görə, separatçı kürdlər hökumətin bu qərarını heçə sayaraq, Şanlıurfada xüsusi mərkəz təsis edərək oraya bütün kürd bölgələrindən, eləcə də Türkiyənin digər regionlarından kürdləri könüllü olaraq dəvət edirlər: “Məqsəd PKK-nın Suriyadakı qolu üçün əsgər toplamaq idi. İŞİD plandan xəbər tutdu və PKK tərəfdarlarının Surucda keçirilən aksiyasında kamikadzeni partlatdı. Bundan sonra HDP və PKK hay-küy salmağa çalışırlar ki, guya bu hadisəni Türkiyə hökuməti törədib. İddia edirlər ki, AKP PKK ilə bağladığı “sülh sazişinin şərtləri”ni pozur. Hökumət isə, HDP-dən tələb edir ki, Qəndil dağlarındakı əsgərlərini aşağı endirsin. AKP yetkililəri bildirirlər ki, əgər həmin kürdlərin heç bir cinayətdə əlləri olmasa, azad olunacaqlar. AKP kürdlərdən Türkiyəyə qarşı elan edilməmiş müharibəni dayandırmalarını istəyir. PKK və HDP tərəfdarları isə bildirirlər ki, “atəşkəs haqqında saziş” imzalanmalıdır, “atəşkəs rejimi” elan edilməlidir və bu prosesin başında həbsdən azad olunacaq terrorbaşı Abdullah Öcalan durmalıdır. Bunlar qeyri-səmimi və riyakar iddialardır. Kürdlər öz dövlətlərinə və hökumətlərinə qarşı qiyam qaldırmaqla separatçı hərəkat yaradaraq AKP-dən əli 35 min insanın qanına batmış Öcalanla saziş imzalamağı tələb edirlər. Bu, tamamilə cəfəngiyyatdır. Güman edirəm ki, Ərdoğanın son çıxışlarından birində “çözüm prosesi dalana dirənib” deməsi, buradan qaynaqlanır. PKK və HDP də hay-küy qaldıraraq, kürd məsələsinin çözüm prosesinin davam etməsinin vacibliyini qabağa çəkirlər. Baş verən son hadisələr göstərdi ki, kürdlər öz partiyaları ilə parlamentdə təmsil olunmalarına baxmayaraq, Türkiyə qanunvericiliyi əsasında mübarizə aparmaq niyyətində deyillər. Onlar qeyri-qanuni yollarla yaşadığı bölgələrdə toponimləri dəyişirlər, istədikləri vəzifələrə adamlarını təyin edirlər, valilərin istefalarını tələb edirlər. Eyni zamanda Türkiyə dövlətinin ərazi bütövlüyünə xələl gətirən iddialar irəli sürürlər. Vəziyyət gərginləşib. Belə olan halda Türkiyə hökuməti dövlətin suverenliyini müdafiə edəcək qərarlar verəcək. Bundan sonra kürdlər Türkiyədə dinclik içərisində yaşamağın onlar üçün daha yaxşı olmasını anlayacaqlar. Çünki, heç bir halda Türkiyə hökuməti tərəfindən kürdləri narazı salacaq addımlar atılmır, əksinə onların özləri mərkəzdənqaçma siyasəti yürütməyə meyllidirlər”.

“Qərbdən “müstəqil dövlət” vədləri verilib”

Qabil Hüseynli hesab edir ki, bəzi Qərb dövlətləri kürdləri qızışdıraraq ayağa qaldırırlar. Politoloqun sözlərinə görə, separatçı kürdlərə Qərbdən “müstəqil dövlət” yaratmalarına yardım vədləri verilib: “Kürdlərin məqsədi Suriyadakı kürd bölgələri, Bərzaninin İraqda “müstəqil dövlət” elan etdiyi əraziləri, eləcə də Türkiyə və İrandakı bəzi regionları vahid bayraq altında birləşdirərək, “Böyük Kürdüstan”ı qurmaqdır. Türkiyədəki kürdlər məhz bu niyyətləri üçün mübarizə aparırlar. İran tərəfi bu prosesin əleyhinədir, heç bir halda öz ərazilərini kürdlərin nəzarətinə verməz. Türkiyə də heç cür buna razı olmaz. Çünki, Türkiyə bölgənin ən böyük dövlətlərindən biridir. Kürdlər isə Suriyada baş verənlərdən istifadə edərək, hətta türkmən ərazilərini də işğal edərək nəzarət etdikləri bölgələrin tərkibinə qatıblar. İraqda da eyni proses baş verib. Yəni, kürdlərin niyyəti tamamilə separatizmə əsaslanır və heç bir dövlət bununla razı ola bilməz”.