QAT Ali Məclisinin növbəti iclası keçirilib. İlk olaraq təşkilati məsələlərə baxılıb.

QAT- ın mətbuat xidmətindən Teleqraf.az-a verilən məlumata görə, Qarabağ döyüşçüsü, batalyon komandiri Qələndər İsmayılov Ali Məclisə üzv seçilib. 
İclasa sədrlik edən Fəridə Əsgərovanın giriş sözündən sonra QAT sədri Akif Nağı geniş məruzə ilə çıxış edib, sonra müzakirələr aparılıb. Fəridə Əsgərova, Nəsib Cəfərov, Mahirə Muradova, Vaqif Əlisoy, Polad Soltanov(Zaqatala), Arzu İsmayılov(Gəncə), Məmmədəli Quliyev (Sumqayıt), Yusif Səmədov, Hüseyn Həsənov, Firidun Məmmədov, Şahmar İbrahimov, Rəhman Cəfərov və digərləri çıxış edərək təkliflərini veriblər. 
Iclasda bir sıra məsələlərlə bağlı, o cümlədən ATƏT Minsk qrupunun fəaliyyətinə xitam verilməsi, Birinci Avropa Oyunlarında ermənilərin iştirakının yolverilməzliyi, Türkiyə, Iran və Gürcüstan QHT-ləri ilə əlaqələrin genişləndirilməsi ilə əlaqədar qərarlar qəbul olunub. Ali Məclis üzvləri xüsusi olaraq qeyd ediblər ki, Azərbaycan hakimiyyəti mənasız danışıqları dayandırmalı və dərhal işğalçı Ermənistana qarşı hərbi əməliyyatlara başlamalı, təmas xəttindəki lokal döyüşləri irimiqyaslı hərbi əməliyyatlara çevirməlidir. 
Ali Məclisdə həmçinin 31 Mart Soyqırım, 2 Aprel Kəlbəcərin işğal günləri ilə bağlı anım mərasimlərinin, Çanaqqala zəfərinin 100 illiyi ilə əlaqədar tədbirlərin reallaşdırılması, iyun ayında QAT-ın Ümumrespublika Müşavirəsinin keçirilməsi ilə bağlı qərarlar qəbul olunub.