Avropa İttifaqının Şərq tərəfdaşlığı ölkələrində KİV azadlığının monitorinqi layihəsi KİV azadlığı reytinqini açıqlayıb.

 2014-cü ilin ilk yarısının nəticələrinə görə, Gürcüstan birinci yeri tutur, ardınca Ukrayna, Ermənistan, Azərbaycan gəlir. Siyahını Belarus bağlayır. İndeks “Siyasət”, “Təcrübə”, “Teleradioyayım”, “İnternet və yeni media” kateqoriyaları üzrə balların toplanması ilə əldə olunur.

Mövzu ilə bağlı Deyerler.org-a fikirlərini bölüşən “Turan” İnformasiya Mərkəzinin rəhbəri Mehman Əliyev deyib ki, Azərbaycanda medianın azadlığı tam ifalasa uğrayıb: “Gürcüstan bu gün kifayət qədər inkişaf edib. Mətbuatın azadlığı ayrı-ayrılıqda baş verə bilməz. Dövlətdə gedən proseslər, siyasi sistem birbaşa medianın durumuna da təsir edir. Gürcüstanda azad seçkilər keçirilir. Parlamentdə azad seçkilər yolu ilə partiyalar təmsil olunur. Demək olar ki, şəffaf dövlətin qurulması istiqamətində işlər görülür. Biznes azaddır. Siyasi hakimiyyətdə inhisar olmdığından, mətbuatda da bu hal müşahidə olunmur. Bütün bunlar mətbuata təsir edən amillərdəndir.

Ukraynada da bir çox istiqamətdə inkişaflar göz qabağındadır. Ölkədə ciddi rəqabət abhavası yaradılıb. Bu baxımdan bütün bunların inkişafı da medianın durumuna təsir edir. Ermənistanda  bu proseslər zəif də olsa müəyyən inkişaf gedir. Parlamentdə müxalifət də təmsil olunur, kifayət qədər müstəqil maliyyə imkanları mövcuddur, çoxlu müstəqil telekanalları yayımlanır. Moldovada da vəziyyət bu istiqamətdə müəyyən dərəcədə inkişaf edir.

Bu baxımdan ölkədə baş verən neqativ göstəricilər sırf mətbuatla bağlı deyil. Mətbuatın durumu ölkədəki durumun bir göstəricisidir.

Azərbaycan mediasının keyfiyyəti, peşəkarlığı kifayət qədər aşağıdır. Bunu keçirtdiyimiz sorğular da göstərir. Son zamanlar bu daha da artıb. Çünki, hakimiyyətin mətbuata təzyiqi artıb. Əgər 10 il öncə hökumət mediaya mənzil təklif etsəydi, hökumətə loyal münasibət bəsləyən tək-tük media bu məzulləri alardı. Amma indi mətbuat o günə düşüb ki, o mənzilləri əldə etmək üçün növbəyə durular. Bu artıq medianın göstəricisidir. Azərbaycanda medianın azadlığı tam iflasa uğrayıb. Bu da medanın yaradıcılıq səviyyəsinə kifayət qədər mənfi təsir edir”.