Elşən Əlisoy

Kəlbəcərin işğalı əzəmətli Murov dağını sanki kiçilti. Ağ saçlı Murov qüssədən beli bükülmüş bir qocaya bənzədi. Elin gözəl qızları üçün sinəsində ətirli çiçəklər bitirən Murovun sinəsini kol-kos bürüdü. Zirvələrdən elin igidlərini seyr edib əzəmətləşən Murov, vətənini yadlara verib qaçanları gördükdən sonra dumandan-kiskindən üzünə niqab taxdı. Utandı zirvələrdən Tanrıya hesab verməyə.

 Kəlbəcərin əsrliyi üzdü Murovu. Kəlbəcərlilərdən daha çox üzüldü əzəmətli Murov dağı... Bunula belə qıymadı, kükrəmədi, yol verdi qarlı aşırımlarında qaçan övladlarına. Bəlkə də qayıdaclqarına inandı. İnandı! İnandı ki, qayıdacaq igid övladları, dönük çıxa bilməzlər. İgid əsgərlərinin oxuduqları əzəmətli marşları çox özlədi!!! 23 il başını dik tutmadı... Bəlkə də, özünü günahkar bildi Murov. Gərək yol verməyəydim deyə çox qınadı özünü. Neçə-neçə şəhidlərimizi sinəsinə çəkdi. Sanki təsəlli tapdı şəhidlərimizlə.

Kəlbəcərin işğalından sonra ətri də qaçdı Murovun kəklikotusunun. Tamı dəyişdi soyuq bulaqlarının. Savaşmaq, elinə sahib olmaq əvəzinə üzərinə yeyib-içməyə gələn el-oğularını görəndə ümidi öldü Murovun. Nədən oldu? Harda səhv etmişdi deyə çox düşündü... Bircə damcı da olsun haram su içirməmişdi axı övladlarına!!! Ən təmiz havası ilə bəsləmişdi onları. “Bəs bu dönüklük nədəndi” deyə çox düşündü qoca Murov. iyrəndi əlində araq stəkanı tutub “Kəlbəcər” şeirləri deyib, vətən poemaları yazanlardan. “Bəyəm təkçə içəndə yada düşür vətən?” deyə qüssələndi. Saraylarda boş çıxışlara əl çalıb, Kəlbəcərin əvəzinə verilən evlər üçün yaltaqcasına tərif deyənlərdən utandı. Axı belə övladlardan kim qürur duya bilər ki...? İllərlə həsrət qaldığı övladını gözləyən ata kimi gözü yolda qalıb əzəmətli Murov dağının. Tək ümidi Dilqəmlərə, Şahbazlara, Həsənlərə oldu. Mübarizlər, Fəridlər oldu tək təsəllisi qoca Murovun.

Bu gün də gözü yolda, qulağı səsdə qalıb. Kəlbəcərə doğru irəlliləyən igid əsgərlərinin ayaq səslərini eşitmək istəyir. Düşmənə doğru atılan mərmilərin barıt qoxusunu duymaq, zirvəsində dalğalanan Azərbaycan bayrağını bağrına basmaq istəyir başı qarlı Murov dağı.

Teleqraf.az