Elşad MUSAYEV

Məlum olur ki, hakimiyyətin ən çox qorxduğu güc, hər gün döydüyü, istismar etdiyi, hər cür hüquqlardan , o cümlədən də seçib-seçilmək hüququndan məhrum etdiyi sadə xalqdır. Ona görə də, xalqa düz söz demək imkanlarını məhdudlaşdırır,xof yaradır, bunun üçün qaba gücdən, həbslərdən çəkinmir. 9 saylı Binəqədi seçki dairəsində 37 məntəqə var, amma seçicilərlə çörüş keçirmək üçün seçki dairəsinin tam kənarında cəmi iki yer müəyyən edilib. Belə çıxır ki, 37 məntəqənin 35-də təbliğat aparmaq qadağandır. DSK-dan bu iki yerin Bİnəqədi İH tərəfindən müəyyənləşdirildiyi bildirilir. Əllərində hər cür gücün, onbaşı, yüzbaşı, minbaşılardan ibarət çetenin, karuseldə “fırlanmaq” üçün hazır JEK işçilərinin, müəllimlərin, tibb işçilərinin, “könüllülər”in, hüquq mühafizə işçilərinin olduğu halda adi görüşlərə yasaq qoymaq qorxaqlıq əlamətidir. Hörmətli iqtidar mənsubları, 20 ildən çoxdur ki, böyümürsünüz, cığal uşaq kimi ildən-ilə daha primitiv münaqişəyə sürükləyirsiniz bizləri. Hiss etmirsinizmi dünya dəyişir? Artıq jurnal bitir, real həyat başlayır. Neft pullarını dağıtdınız, bankdakı pulları göyə sovurdunuz. Biz, sizi səbrlə, hövsələ ilə düz yola, danışığa çağırırıq, seçmək xalqın hüququ olduğu üçün bu hüququ zorlamamağa çağırırıq, amma sizlərdən təkrar zorakılıq görürük. Biz ölkədə sabitlik olması, dövlətçiliyin qorunması üçün hər cür mərhumiyyətlərə dözürük, amma siz fərqınə baxmadan hər cür qanunsuzluqlarla vəziyyəti gərginləşdirirsiniz, Azərbaycanı bütün dünya ilə düşmən edirsiniz. Bu seçkilər də bitəcək, amma həyat bitməyəcək. Nə istəyirsiniz edin, ancaq bircə şeyi yadda saxlayın:

HAKİMİYYƏT XALQIN İSTƏNİLƏN BİR QÜVVƏYƏ VERDİYİ ƏMANƏTDİR. ƏMANƏTİN HESABI İSƏ GEC YA TEZ MÜTLƏQ SORULUR…