Zahir Əzəmət

Azərbaycan müxalifəti heç vaxt bu qədər zəif olmayıb. Bunun çoxlu səbəbləri var. Amma indi yazımın məqsədi müxalifətin niyə zəifləməsini araşdırmaq deyil. Sözümün canı var.

Fakt budur ki, artıq Azərbaycan müxalifəti kiçik bir qrup halında yalnız internet çayxanasında - "Facebook"da mövcuddur. Və burda da daha çox bir-birlərinə kin-küdurət püskürməklə məşğuldurlar.

Onda sual yaranır: müxalifət bu qədər zəif olduğu halda son bir neçə ildə intensivləşən həbslərə nə ehtiyac var? Müxalifət güc deyilsə, normal bir mitinq, piket, aksiya təşkil edəcək qədər toparlana bilmirsə, vəziyyəti gərginləşdirmək kimə lazımdır? 

Anlaşılan budur ki, kimlərsə Azərbaycan höküməti ilə Qərbin, beynəlxalq təşklatların münasibətlərinin pozulmasında çox maraqlıdır. Qərblə münasibətlər pozulacaqsa, deməli bir yol qalır: Rusiyaya yaxınlaşmaq. 

Proseslərin təhlili də onu göstərir ki, Azərbaycandakı həbslərin arxasında məhz hakimiyyətin içindəki Rusiyameyilli qüvvələr dayanır. Onların da kimliyi siyasi cameəyə bəllidir.

Son "Batumi" qalmaqalı da bunun sübutu idi. Nədənsə Çexiyanın “People in Need” təşkilatını müdafiə edənlər son vaxtlar bu ölkənin xarci siyasətində baş verən kəskin dəyişikliyi diqqətə almadılar. Çexiya prezidenti Miloş Zeman açıq şəkildə Qərbin Rusiyaya tətbiq etdiyi sanskiyalara qarşı çıxır, Rusiyanı müdafiə edir. “People in Need”-lə qalmaqal yaradan Azərbaycan tərəfinin təmsilçilərinin də hökümətdəki Rusiyameyilli qüvvələrə yaxınlığı heç kimə sirr deyil. Belə çıxır ki, bu qalmaqal öncədən və bir mərkəzdən planlaşdırılmışdı. Yəni qalmaqalın bütün tərəfləri bir ələ oynayırdı. Ola bilsin, özləri də bunun fərqində olmadan.

Nəticədə zərbə yenə də Azərbaycan-Qərb münasibətlərinə dəydi.

Dekabrın sonu üçün əfv gözləntiləri var. Ümid edək ki, siyasi kimliyi olan bütün məhbuslar azad ediləcək. 2015-ci il parlament seçkilərinə hazırlaşan Azərbaycan höküməti üçün də bu, Qərblə münasibətləri qaydasına salmaq üçün bir fürsətdir. Çünki Azərbaycanın Qərbə inteqrasiyadan başqa alternativi yoxdur. Qoy bu inteqrasiya hətta arzuladığımız qədər sürətli yox, tədricən olsun, amma olsun.

Qərb gələcək, Rusiya keçmişdir. Həm də pis keçmiş...

Qaynar.info