QAT sədri Akif Nağı Moderator.az-a açıqlamasında həbsdəki OMON-çuların Qarabağda döyüşmək arzusuna münasibət bildirib. A.Nağı hesab edir ki, artıq cəmiyyətdə OMON-çulara olan münasibətin dəyişməsinə ehtiyac var:

“Hesab edirəm ki, ümumiyyətlə OMON-çularla bağlı münasibət dəyişməlidir. O insanların demək olar ki, hamısı vətən uğrunda, Qarabağ uğrunda fədakarlıq edən, döyüşən insanlardır. Bu insanlar vətən uğrunda öz canlarını qoyublar. Onların bir hissəsi azadlıqda olsa da, bir hissəsi həbsdədir. Onların əksəriyyəti həbs yolunu keçib. Onların içərisində bizim tanıdıqlarımız, üzvlərimiz də var. 9-10 il həbsdə yatanlar oldu. Indi də həbsdə yatanlar var. Bildiyim qədəri ilə OMON-çular arasında ömürlük həbs cəzası alanlar da var. Hesab edirəm ki, bu insanların xidməti hökmən nəzərə alınmalıdır”.

A.Nağının sözlərinə görə, məlum proseslərin üstündən kifayət qədər zaman keçib və bu baxımdan OMON-çulara olan münasibəti yaxşı mənada dəyişməyə, onlara yenidən etimad göstərməyə ehtiyac var: “Mən anlayıram ki, ortada bəzi məsələlər, siyasi proseslər oldu. Cəmiyyətdə OMON-çularla bağlı xoşagəlməz bir fikir formalaşdı. Bunların hamısı oldu, keçdi. Artıq bu hadisələrin üzərindən çox vaxt keçib. O vaxtdan bu vaxta qədər insanlar həbsdə qalıb. Əgər onların bir günahı varsa, həbsdə qaldıqları müddət zamanı onların günahı da yuyulub. Azadlıqda olan OMON-çulara münasibət elədir ki, onlar özlərini cəmiyyətdən təcrid olunmuş kimi hiss edirlər. Onlara qarşı belə bir münasibətin sərgilənməsi düzgün deyil”.

QAT sədrinin bildirdiyinə görə, OMON amili ermənilərin ən çox qorxduğu, çəkindiyi amillərdən biri olub:

 “OMON-nun adı gələndə ermənilər zağ-zağ əsirdi. Neçə-neçə əraziləri OMON-çular erməni işğalndan azad edib.

Rövşən Cavadovun özü ilə bağlı da fərqli bir yanaşma olmalıdır. Xalq onun çəkdiyi əziyyətləri, göstərdiyi qəhrəmanlıqları da bilir. Bunların hamısının üzərindən birmənalı şəkildə xətt çəkmək düzgün olmaz. Belə olarsa, bu, tarixin təhrif olunması demək olar. Mən hesab edirəm ki, bu məsələyə yenidən baxılmalıdır. Bu insanlara yenidən özlərini döyüş meydanında göstərmək imkanı verilməlidir. Hesab edirəm ki, həbsdəki bütün OMON-çular azadlığa çıxmalıdır. Ola bilsin ki, bu məsələlər nəzərdən qaçdığı üçün bu vaxta qədər öz həllini tapmayıb”.