Ermənistan parlamentində rəsmi olaraq 19 milyonçunun mövcud olması ilə bağlı yayılan xəbərlər Azərbaycan parlamentindəki mövcud durumu da müzakirə predmetinə çevirib. Azərbaycan parlamentində milyonçular varmı? Varsa Ermənistanla müqayisədə bu nisbət hansı səviyyədədir? Ermənistanın bu məsələdə konkret rəqəmlərlə çıxış etməsi bu ölkənin Aərbaycanla müqayisədə daha demokratik olmasının isbatı hesab edilə bilərmi?

 Bununla bağlı Moderator.az saytı və “Hürriyyət” qəzetinə açıqlama verən KXCP sədri Mirmahmud Mirəlioğlu hesab edir ki, Azərbaycan parlamenti öz milyonçularının sayına görə, Ermənistan parlamentindən daha üstündür. M.Mirəlioğlunun qənaətincə, sadəcə ölkədə lazımi şəffaflıq və demokratiya olmadığı üçün kimsə öz sərvəti haqqında məlumatı ictimaiyyələşdirməkdə maraqlı deyil:

“Doğrusu, bu haqda heç bir məlumatım yoxdur və buna görə də bu məsələni məhz sizə istinadən şərh edə bilərəm. Ermənistan heç bir parametr üzrə Azərbaycanla müqayisə oluna bilməz. Ermənistanın Azərbaycan qarşısında sadəcə bir üstünlüyü var ki, o da bizim torpaqları hələ də işğal altında saxlamasıdır. Ermənistanın bu torpaqları kimin əli ilə işğal etməsindən, kimin vassalına çevrilməsindən asılı olmayaraq, bu faktdır. De-fakto torpaqlarımız işğal altındadır. Bizim nə deməyimizdən və hansı səviyyədə əzələ nümayiş etdirməyimizdən asılı olmayaraq, bu bir reallıqdır. Parlamentdəki milyonçuların sayına gəlincə, əminəm ki, Ermənistan bütün digər məsələlərdə Azərbaycandan geridə qaldığı kimi, bu məsələ də bizdən geri qalar. Sadəcə olaraq, bizdə aşkarlıq, şəffaflıq olmadığına görə bu məsələlər ortaya çıxmır”.

M.Mirəlioğlunun sözlərinə görə, bu gün Azərbaycan parlamentində təmsil olunanların böyük əksəriyyəti ya milyonçu, ya da milyonçu çətiri altında gəzənlərdən ibarətdir:

“Məncə Azərbaycan parlamentində 19-20 nəfər, ən çoxu 25 nəfər milyonçu olmaya bilər. Qalanları ya milyonçudur, ya da milyonçuların çətiri altındadır. Dediklərim kimsənin xətrinə dəyməsin. Kimsə düşünməsin ki, kimisə təhqir edirik. Lakin əgər kimsə məsələyə fərqli yanaşarsa, o zaman biz araşdırıb kimin kimin orbitində fırlandığını ortaya qoya bilərik”.

Teleqraf.az