Röya Rəfiyeva: “Nərimanov rayon Məhkəməsi əsassız olaraq şirkəti müdafiə edir, əvvəlki iddiaya baxmadan geri qaytarıb”

“Yeni Müsavat” qəzetinin əməkdaşı və “Kanal 13” internet televiziyasının aparıcısı Röya Rəfiyeva “Akkord” Şirkətlər Qrupunu məhkəməyə verib.

Teleqraf.az-ın məlumatına görə. bu barədə jurnalist özünün “feysbuk” səhifəsində yazıb. O, bildirib ki, bu, şirkətlə bağlı məhkəməyə edilən ikinci müraciətdir.

““Akkord”u yenidən məhkəməyə verdim. Vəkilim dəyərli və peşəkar hüquqşünas Əkrəm Həsənovdur. Vəkilimə inansam da, ölkənin məhkəmə sistemindən ədalət deyil, möcüzə gözləyirəm. Mart ayında məhkəməyə müraciət etmişdik, məhkəmə əsassız olaraq iddiamızı təmin etmədi. Nəticədə yenidən Nərimanov Rayon Məhkəməsinə müraciət etdik. Bu ölkədə “Akkord” kimi ikinci məsuliyyətsiz şirkət varmı görəsən? Məhkəmə də əsassız olaraq şirkəti müdafiə edir, əvvəlki iddiaya baxmadan geri qaytarıb. Qeyd edim ki, şirkətdən iki il əvvəl aldığım evlə, həmçinin müqavilə şərtləri ilə bağlı çoxsaylı problemlər var. Bir-bir məhkəməyə verməyi qərara aldım. Əvvəlcə mənzillə bağlı sənədlərimi tələb edirəm. Sonra da yavaş-yavaş başqa problemləri mübahisələndirəcəm. Bu işdən sonra “Akkord”la bağlı bir neçə tələb üzrə məhkəməyə müraciət etməyi düşünürəm. Daha sonra da bankı məhkəməyə verəcəm”.

Jurnalistin sözlərinə görə, 2014-cü ildə şirktədən aldığı evlə bağlı çoxsaylı problemlər yaranıb. Şirkət isə həmin problemləri həll etməyib. Üstəlik, bina indiyədək təhvil verilməyib və bu səbəbdən orada təbii qaz da yoxdur. “İki il əvvəl ev aldığım “Akkord” şirkətini məhkəməyə verdim. 2014-cü ilin fevralında aldığım mənzildə çox sayda və ciddi problemlər yaranıb. Dəfələrlə şirkət rəhbərliyinə bu barədə məlumat vermişəm, heç bir nəticəsi olmayıb, problemlər aradan qaldırılmayıb. 2014-cü ildə binaya qaz çəkiləcəyi bildirilsə də, hələ də evi elektrikin hesabına qızdırmaqdayam və işıq pulu büdcəmi sökür. Mənzil çox keyfiyyətsizdir, bunları detallı halda dəfələrlə şirkətə bildirsəm də, qulaqardına vurulub. Ötən ilin sentyabrında isə mətbəx mebeli divardan qopub və nəticədə ev əşyalarım sıradan çıxıb. Həmçinin sonradan bir neçə vəkilə bağladığımız müqaviləni göstərmişəm, alıcının xeyrinə bir bənd belə yoxdur. Bu, azmış kimi, şirkət mənə sonradan məcburi olaraq bankla müqavilə bağladıb və burada da çoxsaylı problemlər var... Saymaqla bitmir ki... Beləliklə, bir-bir məhkəməyə verməyi qərara aldım”.