Rəsmi Bakı Moskvadan izahat istədi; Rusiya XİN-i məsələ ilə bağlı açıqlama verdi

 Sosial şəbəkələrdə Emil Arzangulyan adlı şəxsin Rusiya Federasiyasında aldığı sürücülük vəsiqəsində doğum yerinin “Dağlıq Qarabağ” göstərildiyi haqda məlumat yenidən gündəmə gəlib. Nəzərə çatdıraq ki, bu haqda “Yeni Müsavat” qəzeti daha əvvəl yazmışdı. 

  Xarici İşlər Nazirliyinin mətbuat xidmətinin rəhbəri Hikmət Hacıyev məsələ ilə bağlı mediaya verdiyi açıqlamada qeyd edib ki, Xarici İşlər Nazirliyi tərəfindən verilmiş təlimat əsasında Azərbaycan Respublikasının Rusiya Federasıyasındakı səfirliyi bununla əlaqədar Rusiya Xarici İşlər və Daxili İşlər nazirliklərinə müraciət ünvanlayıb. Rusiya Xarici İşlər Nazirliyindən bugünlərdə daxil olmuş cavab notasında Rusiya Federasiyasının Azərbaycan Respublikasının ərazi bütövlüyü və suverenliyinə hörmət etdiyi və münaqişənin həlli çərçivəsində üzərinə götürdüyü öhdəliklərə davamlı şəkildə sadiqlik nümayiş etdirdiyi qeyd olunur.

 E.B.Arzangulyan tərəfindən sosial şəbəkələrdə yayılmış məlumatın heç bir halda Rusiya Federasiyasının bu məsələ ilə əlaqədar rəsmi mövqeyinə aidiyyəti olmadığı vurğulanır.

Notada həmçinin Rusiya Federasiyası Daxili İşlər Nazirliyinin 365 nömrəli 13 may 2009-cu il tarixli əmri ilə təsdiq olunmuş Rusiya Federasiyasında sürücülük vəsiqələrinin rəsmiləşdirilməsi və verilməsi haqqında qaydalara müvafiq olaraq, sürücülük vəsiqələrinin doğum yeri adlı bölməsində daha böyük inzibati-ərazi vahidinin adının qeyd olunduğu barəsində məlumat verilir. 

 Notada E.B.Arzangulyanın müəyyən edildiyi kimi, Azərbaycan Sovet Sosialist Respublikasının (ASSR) Dağlıq Qarabağ Muxtar Vilayətində (DQMV) anadan olduğunu nəzərə alaraq, onun sürücülük vəsiqəsində qeyd olunan “Dağlıq Qarabağ” ifadəsi ilə ASSR-in DQMV-nin nəzərdə tutulduğu bildirilir.

 ***

Bu arada beynəlxalq aləmin diqqəti Dağlıq Qarabağda keçirilməsi planlaşdırılan qondarma “parlament seçkiləri”nə də yönəlib. İsveçrə də Dağlıq Qarabağda qondarma “parlament seçkiləri”ni qanunsuz hesab etdiyini açıqlayıb. “İsveçrə Dağlıq Qarabağda bu il mayın 3-nə planlaşdırılan qondarma ”parlament seçkiləri"ni qanunsuz hesab edir. Bu barədə "Trend"ə İsveçrə Xarici İşlər Nazirliyindən bildiriblər.

 XİN-dən qeyd ediblər ki, İsveçrə beynəlxalq hüquq prinsiplərinə müvafiq olaraq və Azərbaycanın ərazi bütövlüyü və suverenliyinə hörmət edərək Azərbaycanın Dağlıq Qarabağ regionunda qondarma “seçkilər”i qanunsuz hesab edir. İsveçrə XİN təkrar edir ki, Dağlıq Qarabağ münaqişəsinin nəticələri barədə məlumatlıdır və ATƏT-in Minsk Qrupunun münaqişənin beynəlxalq hüquq normalarına uyğun həlli üzrə səylərini dəstəkləməyə davam edir.

 Nəzərə çatdıraq ki, daha əvvəl Avropa İttifaqı (Aİ) Dağlıq Qarabağda qondarma “parlament seçkiləri”ni tanımadığını açıqlayıb. Aİ-nin mətbuat xidmətindən bildirilmişdi ki, Dağlıq Qarabağda “parlament seçkiləri”nin keçirilməsindən xəbərimiz var və bu istiqamətdə hadisələrin gedişatını izləyirik: “Avropa İttifaqı, eyni zamanda Cənubi Osetiyada keçirilmiş seçkiləri tanımır. Cənubi Osetiya ilə bağlı bəyan edirik ki, Aİ Gürcüstanın ərazi bütövlüyünü və suverenliyini tanıyır”.

 Həmçinin Macarıstan da Dağlıq Qarabağda qondarma “parlament seçkiləri”ni tanımır. Macarıstan Xarici İşlər Nazirliyinin bu mövqeyini mətbuata adıçəkilən ölkənin Azərbaycandakı səfiri Jolt Çutora çatdırıb: “Seçkilər”in dünyada heç bir ölkənin tanımadığı separatçı rejim tərəfindən keçirilməsi planlaşdırılır. Bu məsələdə Macarıstan XİN-in rəsmi mövqeyi Avropa İttifaqının mövqeyi ilə tam üst-üstə düşür".

 musavat.com