Siyasi Partiyaların Demokratiya və İnsan Haqqları Mərkəzi Azərbaycanda demokratiyanın vəziyyəti mövzusunda konfrans keçirib.

ADP-nin mərkəzi qərərgahında keçirilən konfransda KXCP, Müsavat, “Ümid” ADP  və ümumilikdə 16 təşkilatın nümayəndələri iştirak edir. Teleqraf.az-ın həmin iclasda olan əməkdaşının  verdiyi məlumata görə İclasa KXCP Sədri Mirmahmud Mirəlioğlu sədirlik edir.

Tədbir dövlət himninin səslənməsi ilə başlanıb . Bundan sonra Xalq Cümhuriyyətinin qurucuları və şəhidlərimizin xatirəsi bir dəqiqəlik sükutla yad edilib.

KXCP Sədri Mirmahmud Mirəlioğlu çıxış edərək tədbirdə iştirak edənlərə öz təşəkkürünü bildirib.  Azərbaycanda olan avtoritar rejimdən danışan KXCP Sədri onu da bildirdi ki, konfransa parlamentdə təmsil olunan partiyalar, həmçinin hakim partiya olan YAP -da dəvət olunub.  Bundan sonra KXCP Sədri çıxış üçün sözü Müsavat başqanı İsa Qəmbərə verib.

Çıxış edən Müsavat başqanı bildirib ki, ki, mövcud rejim ölkədə demokratiyanı məhdudlaşdırmaq yolunu tutub. O, fakt kimi sadəcə Konstitusiyanın dəyişdirilməsini, iki dəfə keçirilən referendumu göstərib.

“Biz nə edəcəyimizi müzakirə etməliyik. Bu, demokratiyanın qarşısının alınması rejimin seçimidir, özünün rəva gördüyü yanaşmadır. Günahı ilk növbədə rejimdə görməliyik. Həmçinin daxili və xarici amillər var”. İ.Qəmbər beynəlxalq təşkilatları da bu məsələdə qınayıb. Demokratiyanın qarşısın alan Rusiyadır, Moskva belə istəyir deyən İsa Qəmbər, buna baxmayaraq Azərbaycanda demokratiyanın inkişafı üçün yenidən bir başlanğıc edəcəyik”,- deyə Müsavat başqanı dəyişikliklərin yaxında olduğunu vurğulayıb.

Daha sonra çıxış edən “Ümid” partiyasının sədri İqbal Ağazadə bildirib ki, demokratiya təkcə qərbin işi deyil, cəmiyyətimiz dəbu işlərdə aktiv olmalıdır. İlk öncə  “nə etməli” sualına cavab axtarmaq lazımdır: “Cəmiyyətə açıq olmalıyıq. Xalq bu prosesə cəlb olunmalıdır. Kim nə qədər mübarizə apara bilirsə, o siyasi təşkilatlarla o qədər irəliləmək lazımdır. Xalq prosesin içinə alınmayacaqsa, məğubiyyət qaçılmazdır. Funksional əməkdaşlıq üçün bizə heç nə mane olmamalıdır. cəmiyyətdə bir siyasət qorxusu var: “Bu qorxu götürülməlidir və daha çox insan bizim sıralarımıza cəlb olunmalıdır”.  

Daha sonra çıxış edən “Azadlıq” Partiyasının sədri Əhməd Oruc  bildirib ki, demokratik inkişafı təmin etmək üçün ilk öncə polemikalara açıq olmaq lazımdır: “Bu məsələləri müzakirə etməliyik, bundan çəkinməli deyilik”.

çıxış edən “Aydınlar” Partiyasının sədri Qulamhüseyn Əlibəyli isə qeyd edib ki, heç kim bizim əvəzimizə gəlib demokratik mühit yaratmayacaq: “Vuruşuruq, biz vuruşacağıq. Sıradan çıxanlar var, ağırdır, bunu bilirik. Amma bu yolda yürümək lazımdır”.

“Vəhdət” Partiyasının sədri Tahir Kərimli isə müxalifəti qabiliyyətsizlikdə ittiham edib. “Niyə xalq sizi dəstəkləmir? Ya xalq müdrik deyil, ya da müdrikdirsə, niyə sizi dəstəkləmir? Niyə indiyədək heç bir lider demir ki, mən hakimiyyətə gəlsəm, siyasi sabitliyi bərpa edəcəm. Niyə boyun olmurlar? Hərdən çaşıb mən də özümü müxalifətə aid edirəm. Məni iqtidarın adamı adlandırırlar. Buna görə qorxumdan “feysbuk”a girə bilmirəm”.

Bu isə tədbirdə bir qədər gərginlik yaradıb. Müsavat başqanı İ.Qəmbər yenidən söz alaraq deyib ki, xalq müxalifəti dəstəkləyir və elə ilk demokratik seçkidə buna şahid olmaq olar: “Cəmiyyət dinc yolla dəyişikliyə etimadı itirib, buna görə proseslərə qoşulmur”.  

Azad Demokratlar Partiyasının sədri Sülhəddin Əkbər isə bildirib ki, müxalifət daxili yarışdan imtina etməlidir. Həmçinin hakimiyyətlə dialoq və əməkdaşlıq yolunu hər zaman vurğulamaq lazımdır.  

AXP sədri Pənah Hüseyn güclənmək lazım olduğunu deyərək bildirdi ki, “kütlənin passivliyi siyasətçilərin passivliyindən keçir. Bu gün bu fəallaşmanın proqramı verilir”.Pənah Hüseyn kütləvi aksiyaların keçirilməsinin müzakirə edilməsini də təklif edib.   

Müsavat Partiyasının İcra Aparatının rəhbəri Arif Hacılı isə bildirib ki, demokratiyanın vəziyyətini, Azərbaycan cəmiyyətindəki vəziyyəti bilməyən yoxdur. Onun sözlərinə görə, Azərbaycan hakimiyyəti 2009-ci ildə bir nəfərin iki dəfə prezident seçilməsi qadağasını ləğv etdikdən sonra Azərbayacan cəmiyyəti ilə əlaqədar siyasi baxışlarını dəyişib: “İmitasiyaya ehtiyac görmür artıq”.